Балаларға арналған қазақша қандай тақпақтар бар?
Балаларға арналған тапақтарды тізбектемес бұрын, балалар әдебиетінің өкілдеріне бір шолу жасап алғанымыз дұрыс болар. Қазақ әдебиетіндегі балалар әдебиетінің өкілдері: Ахмет Байтұрсынұлы, Мұзафар Әлімбаев, Тұманбай Молдағалиев, Қадыр Мырза Әлі, одан берідегі Ескен Елубаев, Өтепберген Ақыпбеков, Сұлтан Қалиұлы, Нұрхан Жанаев, Өтебай Нұрманжанов, Әдібай Табылдиев, Нұрсұлтан Әлімқұлов, Әнуарбек Дүйсенбиев, Қастек Баянбай, Жақан Смақов, Жәнібек Кәрбозин, Нұрхан Жанаев, Есентай Ербөпин, Жеңіс Қашқынов, т.б. Бүлдіршіндерімізге арналған тақпақтар іздеу барысында ең алдымен жоғарыда аты аталған қаламгерлеріміздің шығармашылығына назар салсаңыз, құнды да мәнді туындылармен таныс болып, балаңызға тақпақ жаттатып қана қоймай, сана-сезім, ой өрісінің кеңеюіне ықпал етесіз.
Бес саусақ
Бас бармағым - атам, үйдің данасы.
Балаң үйрек - әжем, ошақ анасы.
Ортан терек - әкем, отау панасы.
Шылдыр шүмек - шешем, шаңырақ ажары.
Титтей - бөбек - мен, бәрінің базары.
***
Апта
Жеті күнім- бір Апта:
Жету үшін мұратқа,
Апта бойы құр жатпай,
Алға қарай бір атта!
***
Санамақ
Бір-дегенім, білеу.
Екі - дегенім, егеу.
Үш - дегенім, үскіл.
Төрт - дегенім төсек.
Бес - дегенім бесік.
Алты - дегенім, асық.
Жеті - дегенім, желке.
Сегіз - дегенім серке.
Тоғыз - дегенім торқа.
Он дегенім - оймақ.
Он бір- қара жұмбақ.
***
Ата, зейiн салдың ба?
Бар әрiптiң алдында
Нелiктен «А» тұрады?–
Деп бiр күнi сұрадым.
Атам менiң сауатты
Былай бердi жауапты:
– Ата,
Ана,
Ақыл,
Ар,
Адам…
«А»-дан басталар.
Содан шығар, Құрбаным,
«А»-ның алда тұрғаны!..
***
Шын досың мың қылықты
Көңілді толтырады.
Сен жасап бір былықты,
Бұрышқа ол тұрады.
Өзгені шошындырған
Айыпты теңдеп алып,
Бұрышқа досың тұрған
Тұрасың сен де барып.
***
Кімнің болсын таласы,
Кім жасырар сезімді?
Досыңның да анасы
«Балам» дейді өзіңді.
Түсінбейді оны кім,
Білер, болса санасы.
Сенің анаң – оныкі,
Сенікі – оның анасы.
***
КӨБЕЛЕК
Бейне жеңіл ебелек,
Ұшып-қонып не керек.
Отырған жөн сабақта
Тастағандай шегелеп.
Жеңілтектер сыныпта
Атанады «көбелек».
***
ЖИРАФ
«Жираф» дейміз Есетті,
Дұрыс қойдық атты оған.
Мойнын созып есепті
Көшіреді басқадан.
Аң мен құсқа әңгүдік
Әдетіңмен болма тең.
Өз атыңды мәңгілік
Ұмытасың онда сен.
***
МЫСЫҚ
Жүргендей-ақ қалжырап,
Отырғаны маужырап.
Ұқсас осы мысыққа
Балалар да бар бірақ,
Маужырайтын партада,
Кекіл шашы жалбырап.
***
ҚЫРАУ
Әйнекке ою салады,
Көргендер таң қалады.
Суретшілік өнерге
Үйретеді ол баланы.