Қадір түнінің бүгін болатыны хадистерде айтылған ба?

Қадір түні қай түні келетіні жайында ғалымдар арасында әртүрлі тұжырым айтылған. Бірақ, көпшілік ғұламалардың тоқтамы бойынша, Қадір түні - Рамазан айының 27-ші түні. Өйткені, Ахмәд ибн Хәнбәлдің хадистер жинағында келтірілген бір риуаятта Алланың елшісі (с.а.у.) былай деген: «Қадір түнін іздестірген кісі оны жиырма жетісінің түнінде іздестірсін».[1]. Хадистің  дәрежесі - «сахих».  Сахаба Абдулла ибн Омардан (р.а.) риуаят етілген.  

Бұнымен қатар «Сахих Муслимде» келген риуаятта сахаба Үбәй ибн Кәъбтің мынадай бір сөзі бар:

«Аллаға ант етейін, одан басқа Құдай жоқ, Қадір түні - Рамазан айында. Аллаға ант етейін, оның қай түні болатынын мен білемін. Ол түнді Алла  елшісі құлшылықпен өткізуімізді бұйырған. Ол түн – жиырма жетісіндегі көркем түні болмақ. Оның белгісі: Қадір түні болатын күні күн шуақсыз әппақ болып туады»[2].  

 (Биыл, яғни, 2016 жылы Қадір түні шілденің 1-нен 2-не қараған түніне сай келіп тұр)

[1] Ахмәд ибн Ханбәл - №4793.
[2] Сахих Муслим, Китабус салатиль Мусафирин. №1278 хадис.

Абдусамат Қасым