Әдеби шығарманың қандай жанрлары бар?
Лирикалық жанр. Мұнда өмір шындығы адамның әр түрлі құбылыстарды, жай-жағдайларды қалай қабылдап-сезінетінін бейнелеу, оның ой-сезімін, алған әсерін суреттеу арқылы көрсетіледі. Орыс әдебиетінде кең тараған лирикалық шығармалардан элегия (мұңды өлең), эпиграмма (сықақ өлең), ода (мақтау өлең) және толғаныс (толғау өлең) секілді түрлерін атауға болады. Қазақ халық поэзиясында қалыптасқан жыр түрлерінің (терме, толғау секілді) өзіндік өзгешелігі бар, олар өлеңді ауызша шығарып айту дәстүрлеріне сәйкес қалыптасқан.
Драмалық жанрдың ерекшелігі - мұнда уақиғаны баяндау да, болған жағдайды адамның қабылдап сезінуі арқылы көрсету де бар. шығармаға арқау болатын - өмірлік тартыс, уақиға. Ал уақиғаның барысы, қалай дамитыны кейіпкерлердің сөйлеген сөзінен аңғарылады. Бұл жанрдың негізгі түрлері трагедия, комедия және драма ерте дәуірде қалыптасып, театр өнерінің дамуына байланысты кейін жаңа сипат-белгілермен толықты.
В.Г.Белинский «Поэзияны тегiне, түрiне қарап бөлу» деген еңбегiнде әдебиеттi алдымен эпостық поэзия, лирикалық поэзия, драма деп үшке бөледi де, шығармалардың түр-түрлерін осы жүйені сақтай отырып топтастырады.
Эпостық жанр. Мұнда өмір шындығы негізінен уақиғаны баяндау арқылы көрсетіледі. Уақиғалар, кейіпкерлердің іс-әрекеттері өмірдегі болатын объективті болмыс қалпында алынып бейнеленеді, жазушы тек баяндап жеткізуші ретінде көрінеді.Жазба әдебиетінде эпостық жанрдың роман, повесть, әңгіме сияқты түрлері және сюжетті поэманың жаңа түрі пайда болды.