Вебинар – интернет арқылы өтетін топтық сабақ. Вебинар барысында оның қатысушыларының әрқайсысы – жетекші де, тыңдаушылар да өз компьютерлерінде, ал олардың арасындағы байланыс интернеттің көмегімен орнатылады.
«Вебинар» сөзі web және seminar сөздерін біріктіру арқылы пайда болған.
Вебинарлардың басты артықшылықтары қандай?
Біріншіден, олар интерактивті – олар жүргізуші мен тыңдаушылардың өзара әрекеттесуімен сипатталады. Берілген ақпаратты мәтіндік чатта немесе дауыстық режимде сұрақтар қою, экранды басқару құқығын жүргізушіден тыңдаушыларға беру, сауалнама жүргізу арқылы түрлі тәсілдермен талқылауға болады.
Екіншіден, вебинарлар үшін шектеу жоқ – интернеттің арқасында кеңседе немесе үйде отырып-ақ әлемнің кез келген жерінде вебинарларға қатысуға болады.
Үшіншіден, олар сіздің уақытыңыз бен ақшаңызды үнемдейді – «кәдімгі» семинар өтетін жерге барудың қажеті жоқ.