Жыршы деген кім?

Жыршы деп жыр мен дастан, қиссаларды айтып, тарататын адамды айтамыз. Халқымыздың ерте уақыттан бері өлең, жыр шығарып, толғау және қиссаларды айтатындарды «жыршы», «ақын», «термеші» деп атаған. Дегенмен әр жыршының жырды орындауында өзіндік ерекшеліктері болған. Мысалы, жыршылар белгілі музыкалық аспаптың сүйемелдеуімен және белгілі мақаммен немесе әнмен айтады. Сонымен қатар жыршылар көбіне эпостық және лиро-эпостық жырларды орындаған. Жыршыларды халық ауыз әдебиетін орындаушылар ретінде танығанымен, олардың кейбірі ақындығын көрсетіп, өлең немесе жыр шығарып отырған. Халқымыз жыршыларды ақын-әншілермен, шешендермен бір деңгейге қойып, қошемет көрсеткен. 
Талантты жыршылар халық арасында беделге ие болған. Алайда жыршыларды жыраулармен көп шатастырады. Жыраулар дегеніміз – толғау шығарып, өзі орындаған ақындар. Олар түрлі соғыстарға қатысып, батырлық қырынан да танылған. 
Жыршылар ауыз әдебиетінің сақталып, бүгінгі күнге дейін жетуіне зор үлестерін қосқан әрі жырлардың бірнеше нұсқасын жатқа айтқан.