Төлен Әбдіков деген кім?
Төлен Әбдіков - жазушы. Ол 1942 жылы қыркүйектің 4 жұлдызында Қостанай облысы Жангелді ауданы Еңбек ауылында дүние есігін ашқан. 1965 жылы Қазақ мемлекеттік университетіндегі білімін тәмамдаған. 1965-1970 жылдары "Қазақстан пионері" газетінің әдеби қызметкері болған. 1970-1977 жылдары бөлім меңгерушісі, "Жалын" альманахының бас редакторының орынбасары, 1977-1979 жылдары "Қазақфильм" киностудиясының бас редакторы, 1976-1986 жылдары Қазақстан коммунистік партиясының Орталық комитетінің әдебиет бөлімінің сектор меңгерушісі, "Қазақ әдебиеті" газетінің бас редакторы қызметтерін атқарған. 1994 жылы Қазақстан Республикасы Президентінің көмекшісі болған. 1997 жылдан Қазақстан Республикасы Президенті әкімдігінде ішкі саясат бөлім меңгерушісінің орынбасары болды.
Әбдіковтің алғашқы әңгімесі "Райхан" жас жазушылардың "Таңғы шық" жинағында 1964 жылы жарық көрген. Мұнан кейін 1969 жылы "Көкжиек", 1971 жылы "Күзгі жапырақтар", 1971 жылы "Ақиқат", 1980 жылы "Айтылмаған ақиқат" әңгімелер мен повестер жинақтары мен 1985 жылы "Өліара" романы баспа бетін көрген. Төлен Әбдіковтің жекелеген әңгімелері мен повестері орыс тіліне аударылған. Жазушы қазақ тіліне аударған көне грек аңыздары 1977 жылы "Эллада ерлері" деген атаумен басылып шықты.