Парламент дегеніміз не?

Парламент – елдің барлық тұрғындары мен өңірлерін сайланған өкілдер ұсынатын өкілді орган. Әдетте парламент немесе парламенттің төменгі палатасы жалпы сайлау арқылы құрылады.

Қазіргі мемлекеттерде парламенттер – заң шығарушы органдар, яғни оларға заңдар қабылдау, сондай-ақ белгілі бір дәрежеде атқарушы билікті қалыптастыру және бақылау (мысалы, үкіметке сенімсіздік білдіру және президентке импичмент жариялау рәсімін жүзеге асыру) өкілеттігі берілген.

Қазақстан Республикасының қос палаталы парламенті – заң шығару билігін жүзеге асыратын Республиканың ең жоғары өкілді органы. Парламенттің өкілеттігі оның бірінші сессиясы ашылған сәттен басталып, жаңадан сайланған Парламенттің бірінші сессиясы жұмысқа кіріскен кезден аяқталады. Парламенттің өкілеттік мерзімі кезекті сайланған мәжіліс депутаттарының өкілеттік мерзімімен айқындалады. Парламенттің өкілеттігі Қазақстан Республикасының Конституциясында көзделген жағдайларда және тәртіппен ғана мерзімінен бұрын тоқтатылуы мүмкін.

Парламент тұрақты негізде жұмыс істейтін екі Палатадан: Сенат және Мәжілістен тұрады.

Сенат әрбір облыстан, республикалық маңызы бар қаладан және Қазақстан Республикасының астанасынан екі адамнан сайланатын депутаттардан тұрады. Сенатта қоғамның ұлттық-мәдени және өзге де елеулі мүдделерінің қажеттігі ескеріліп, 15 депутатты Республика Президенті тағайындайды. Сенаттың сайланатын депутаттарының жартысы әрбір 3 жыл сайын қайта сайланады. Сенат депутаттарының өкілеттік мерзімі – 6 жыл.

Мәжіліс 107 депутаттан тұрады.  Мәжілістің 98 депутаты саяси партиялардан партиялық тізімдер бойынша бірыңғай жалпыұлттық округ бойынша жалпыға бірдей, тең және төте сайлау құқығы негізінде жасырын дауыс беру арқылы сайланады. Мәжілістің 9 депутатын Қазақстан халқы Ассамблеясы сайлайды. Мәжіліс депутаттарының өкілеттік мерзімі – 5 жыл.