Жаңа жылдық салаттар рецепті бар ма?

"Сағат" салаты

Қажетті заттар:

• тауық еті - 450 г
• жұмыртқа - 3 дана
• ірімшік - 150 г
• көк пияз - 1 орам
• асбұршақ - 250 г
• тұздалған қияр - 3 дана
• майонез 
• тұз, бұрыш
• зәйтүн, сәбіз - әрлеу үшін

• Асбұршақтың суын төгіп, ыдысқа саламыз. 
• Көк пиязды ұсақтап турап, асбұршаққа қосамыз.
• Оған майдалап туралған ірімшік пен қияр қосамыз. 
• Тауық етін тураймыз. Оны да ыдысымызға саламыз.
• Жұмыртқаның ақуызы мен сарысын бөліп алып, сарысын ұсақтап тураймыз. Ыдысқа саламыз. Ақуызын әрлеу үшін алып қоямыз.
• Салатқа майонез, тұз, бұрыш қосамыз. Араластырамыз. 
• Дөңгелек ыдысқа салатты салып, сағат тәрізді пішін жасаймыз.
• Ақуызды үккіштен өткізіп, салаттың бетіне себеміз. 
• Зәйтүн мен сәбізден сандар мен сағат тілін жасаймыз. Салатымыздың бетін әрлейміз.

"Жаңа жылдық шырша" салаты

Қажетті заттар:

• банан - 350 г
• мандарин - 200 г
• киви - 350 г
• йогурт - 170 г
• бал - 10 г
• күнжіт - 10 г

• Банандарды қабығынан тазалап, дөңгелекшелеп тураймыз. Шыршаға жұлдызша жасау үшін бір дөңгелекшені алып қоямыз.
• Мандариндерді қабығынан тазалап, бөліктерге бөлеміз. 
• Шұңыл ыдысқа йогурт құйып, бал қосамыз да, араластырамыз. 
• Жалпақ ыдысқа кезектеп банан мен мандариндерді қоямыз. Жеміс пирамидасын жасаймыз.
• Жемістерге ақырындап йогурт құямыз. Жан-жағына йогурт жағып шығамыз. 
• Кивиді тазалап, дөңгелекше етіп тураймыз. 
• Кивимен шыршамыздың бетін сәндеп жабамыз. 
• Бананды күнжітке аунатып алып, тіс тазартқыш таяқамен шыршаның төбесіне бекітіп қоямыз. 
• Жеміс шыршасына күнжіт себеміз. 

"Апельсин" салаты

Қажетті заттар:

• тауық еті - 300-350 г
• ірімшік - 150 г
• маринадталған саңырауқұлақ - 150-200 г
• жұмыртқа - 4-5 дана
• сәбіз - 2 дана
• пияз - 2 дана
• сарымсақ (талғамыңыз бойынша) - 2-3 тісше
• өсімдік майы 
• майонез, қаймақ - 250 г

• Сәбізді жуып, дайын болғанша пісіреміз. Тауық етін де пісіріп аламыз. Ұзыншалап тураймыз.
• Жұмыртқаны пісіріп аламыз. Сарысы мен ақуызын ажыратамыз. Үккіштің ұсақ көзінен өткіземіз. Пиязды майға қуырамыз.
• Сәбіздің үштен бір бөлігін пиязбен араластырамыз. Саңырауқұлақты ұсақтап турап, ірімшікті үккіштен өткіземіз. 
• Ыдысқа тағамдық өнімдерді қабаттап саламыз. Әр қабатын салған соң майонез жағамыз. 
• 1-қабат - қуырылған пияз бен сәбіз. 2-қабат - ет. 3-қабат - ірімшік пен жұмыртқаның сарысы. 4-қабат - саңырауқұлақ. 5-қабат - ақуыз. 
• Салаттың бетін сәбізбен апельсин тәрізді етіп әрлейміз.